Erməni söyməkdirmi –“ vətənpərvərlik”?

Pərvin Bəhramoğlu

Bir cəmiyyət olaraq hələ də tam formalaşa bilməmişik. İllərdi milli kimliyimizin axtarışındayıq. Bilmirik özümüzə türk deyək, ya azərbaycanlı, avropalı, asiyalı və ya qafqazlı. Gah azəri olduq, gah Azərbaycan türkü. Bütün bunlar bir cəmiyyətin sağlam yetişməsinə təsir edən xəstəliklərdir. Natamamlıq kompleksi ilə yaşayan bir cəmiyyətdə qısa zamanda qəhramanlaşmaq istəyənlərin də çox olması anlaşılandır. Eyni zamanda cəmiyyətin belə manqurtlaşmış halından məmnun olan qüvvələr də var və həmin qüvvələr bundan planlı şəkildə istifadə etməyi yaxşı bacarır. Bunlardan ən təhlükəlisi də insanlara “vətənpərlik” adı altında yeridilən idealogiyalar və başqalarını vətənpərvər deyilsən damğası vurmaqdır.

Nədir bu vətənpərvərlik? Bu necə ölçülür? Bunu ölçən aparatmı var? Hərkəs vətənpərvər olmaqmı məcburiyyətindədir? Bu kimi suallar tez-tez yaranır və uzun-uzun lüzumsuz müzakirə predmetinə çevrilir. İlk sualın cavabı belə verilir. Dövlətini sevməlisən, düşmənə nifrət etməlisən, prezidentin etrafında sıx birləşməlisən. İkinci sual isə, əgər sən mövcud iqtidarı dəstəkləyirsən və erməniləri söyürsənsə, “vətənpərvər”sən. Siz indi diqqət etsəniz, görə bilərsiz ki, bu hərəkətlər necə də bəsitdir və heç bir əhəmiyyət daşımır. Bəzən vətənpərvər olmadığına görə digərinin şəxsi həyatına kimi müdaxilə edən insanlar var. İnsanlar da şablonlaşıb. Bu foramatda əksəriyyət “vətənpərvər” olub. Düşmənə nifrət var,  iqtidarı o qədər sevməsələr də, siyasətə qarışmırıq deməklə yüngül də olsa “vətənpərvər”lik borclarından çıxırlar.

Zaman-zaman mən də şəxsi həyatımda bu kimi hallarla çox rastlaşmışam. Bəzən məni “vətənpərvər” olmamaqda günahlandırırlar. Vətən xaini isə ən pis damğadır. O ki qaldı  həqiqi mənada vətən sevgisinə,  hər kəs başını dolandıracaq, bir tikə çörək pulunu düşünəcək. Mən özüm “vətənpərvər” sözündən iyrənirəm artıq. Bu ölkənin ən ali qanunu olan konstitusiyasının başına nə oyunlar açıldı. Bu hansı yolla mümkün oldu? Ümumxalq səs verməsi ilə ( referendum). Kimlərsə getdi bu saxta seçkidə iştirak etdi, kimlərsə getmədi, amma sizlərin səsi ilə oldu bu. Saxta prezident seçkisini də, parlament seçkisini də sizlərin səsi və iştirakı ilə keçirdilər. Amma siz - “vətənpərvərlər” ən ali səviyyədə olan saxtakarlıqlara susdunuz. Deyəsən, bu mövzular ağır oldu?...Yəqin çoxunuz deyəcəksiniz ki, bizdən asılı deyil, bizim gücümüz çatmır. Unutmayın ki, seçkini saxtalaşdıranların elə əksəriyyəti övladlarınıza təhsil verən, seçki komisyasının üzləri olan orta məktəb müəllimləridir. 

İndi gəlirəm çox asan mövzulara və hər birimizindən asılı olan məqamlara: rüşvət verərək qiymət alan tələbələrə, rüşvət alaraq ailə saxlayan müəllimlərə. Sizcə, bu insanlar ölkəni necə sevə bilər? Hər biriniz bilirsiniz ki, rüşvət elə bir sağalmaz virus və qurddur ki, ölkəni içindən yeyib məhvə, uçuruma aparır. Bunu ki, bəzilərini “vətənpərvər” olmamaqda qınayan  tələbələr özləri edir. Bu hallara göz yuman digər orqanlar da bir başqa.  Bu rüşvət halı baş verən bütün orqanların işçiləri hansı adla vətənpərvərlikdən, Azərbaycan sevgisindən danışır axı?

İndi isə gələk ən sadə səhlənkarlıqlarımıza. Bir ölkəni sevən insan, az da olsa mədəniyyəti olan insan avtobusun pəncərəsini açib ordan yerə zibil atarmi? Bir kəs vətənini sevsəydi vətənpərvər olsaydı, bu ölkəni zibilləyərdimi? Nədənsə, bəzi məqamlarda, bəzi məkanlarda hami vətən sevdalısıdır.

Bildiyimiz kimi, ən öndə duran problemimiz ərazi bütövlüyümüzdür. Hər kəs müharibədən dəm vurur. Düşünməyin kimsə sizin bu saxta səmimiyyətinizə inansın. Amma bayaq sadaladığım problemlər qaldıqca torpaqlarımız da işğalda qalacaq. Əslində 21 ildə heç 10 min insan küçələrə çıxıb tələb etmədi ki, ey dünya birliyi, ey hakimiyyət, ey insanlar biz torpaqlarımızı geri istəyirik. Deyiləcək sozüm çoxdur. Sonda onu deyim ki, sosial şəbəkələrdə erməni söymək heç də vətənpərlik deyil və ümumiyyətlə düşməni söyəndən qəhrəman olmaz!